ERMUKO FOROA euskal herritarren elkarte bat da, lanbide desberdinetako lagunez osatua, batez ere, unibertsitateko irakaslez. 1998ko otsailaren 13an sortu zen, ETAk Migel Anjel Blanco, Ermuko zinegotzia, hil ondorentxoan, 1997ko uztailaren 12an.

Migel Anjel Blancoren bahiketa ankerrek eta ondorengo hilketa hotzak sekulako erantzuna izan zuen Euskal Herrian eta Espainian. Jendea uholdeka atera zen kalera, herri eta hirietan, hilketaren berri izan ostean. Amorruari eutsi ezinik atera ziren kalera, ETAren ekintza bortitzak gaitzetsi guran. Europako Elkarteko kide izatera heldutako Estatu demokratikoan ezin zitekeen indarkeriarik onartu.

Milioika manifestariok, gainera, alderdi politiko demokratikoei eta Estatuko erakundeei tinkotasuna eta batasuna eskatzen zieten, ez bakarrik ETA azkenik mendean hartzeko, baita Herri Batasunako haren kideak ere. Horrela sortu eta gorpuztu zen Ermuko Espiritua, espainiar demokratek ETAren nazionalismo itsuaren aurka hartutako ebazpiderik garbiena.

1998ko otsailaren 13an jaiotako Ermuko Foroaren sortzaileen artean ondokook zeuden: Vidal de Nicolás, Agustín Ibarrola, José Luis Lopez de Lacalle, Carlos Totorika, Jon Juaristi, Mikel Azurmendi, Francisco Doñate, Iñaki Ezquerra, Edurne Uriarte, Fernando Savater, Cristina Cuesta, Javier Corcuera, Raul Guerra eta Txema Portillo.

ERMUko FOROAk, ez du alderdi politikoen ordezko zereginik bere lepo hartu nahi, eta bere jardunbidea honako lau oinarriotan ezarririk urratuko du:

* Terrorismoaren salaketa eta aurkakotasun osoa Euskal Herrian. Era berean, terrorismoaren itzala zaindu, aldeztu edota babesten duten erakunde politiko, talde kultural eta antzekoak ere salatuko ditu. Esaterako: Batasuna, honen adar gaztea Jarrai-Haika, Amnistiaren Aldeko Batzordeak eta beste hainbat, Espainiako Justiziak legez kanpo jota dituenak. Ermuko Foroak, bestalde, bere jardunean, beti izango ditu gogoan terrorismoaren biktimak, haien aldeko jarrera eta begirunea izanik. Zoritxarrez Foroa bera ere biktimen artean dago, 2000ko maiatzean hil baitzuten José Luis López de Lacalle, gure taldekidea eta kazetaria.

* ‘Euskal arazoa’ deritzona konpontzeko ez dugu onartzen beste esparru politiko-instituzionalik, Espainiako Konstituzio demokratikoan eta Euskal Autonomia Estatutuan zehazten dena baino, bide horretatik heldu baikara Europan diren lurraldeetako autogobernurik altuenera.